حکومەتی هەرێمی كوردستان
SAT, 15 DEC 2018 11:51 Erbil, GMT +3

نێچیرڤان بارزانی: هەرێمی کوردستان بەرەو دواڕۆژێكی باشتر و ڕووناکتر هەنگاو دەنێت

TUE, 25 SEP 2018 19:27 | KRG Cabinet

ئێوارەی ئەمڕۆ سێشەممە ٢٥/٩/٢٠١٨ لە ڕێوڕه‌سمێكدا تونێلی گەلیی زاخۆ لەلایەن بەڕێز نێچیرڤان بارزانی سەرۆک وەزیرانی هەرێمی کوردستانەوە کرایەوە. لەو ڕێوڕه‌سمه‌دا کە ژمارەیەک لە وەزیرانی حکوومەت و پەرلەمانتار، کونسوڵی تورکیا لە هەولێر و بەرپرسانی ئیداریی ناوچه‌كە و جەماوەری زاخۆ ئامادە بوون، سەرۆک وەزیرانی هەرێمی کوردستان وتارێکی پێشکەش کرد.

بەڕێزیان لە وتارەکەیدا تەواوبوونی کارەکانی پڕۆژەی تونێلی دووسایدی گەلیی زاخۆی بە هەنگاوێکی گرنگی ستراتیژیی دیکەی خزمەتگوزاریی حکوومەت بۆ ناوچەکە و هەرێمی کوردستان و عێراق بەگشتی له‌ قه‌ڵه‌م دا کە بە تێچووی (١٤٣) ملیۆن دۆلار وەک پڕۆژەی وەزارەتی ئاوەدانکردنەوە و نیشتەجێکردن، بە سەرپەرشتیی بەڕێوەبەرایەتیی ڕێگەوبانی پارێزگای دهۆک، لەلایەن کۆمپانیای (لیماك)ى توركى و ڕێگاکەی لەلایەن (مان گرووپ) بە ئەنجام گەیشتووە و ئاسانکاری دەکات بۆ هاتووچۆی نێوان هەرێمی کوردستان و عێراق و تورکیا له‌ بواره‌كانی بازرگانی و خزمه‌تگوزاریی هاووڵاتیان به‌گشتی.

لەو بارەیەوە بەخێرهاتنی به‌ڕێزان کونسوڵی تورکیا و سەرۆکی کۆمپانیای جیبەجێکاری کرد، هه‌روه‌ها سوپاسی كۆمپانیای لیماكی كرد كه‌ له‌و باره‌ سه‌خته‌ی هه‌رێمی كوردستاندا ته‌نیا ماوه‌یه‌كی كورت كاری جێبه‌جێكردنی پڕۆژه‌كه‌یان ڕاگرت و دواتر ده‌ستیان پێكرده‌وه‌ و هیوای خواست باوه‌ڕی كۆمپانیای جێبه‌جێكار به‌ هه‌رێمی كوردستان و باوه‌ڕی هه‌رێمی كوردستان به‌ كۆمپانیای جێبه‌جێكار ببێته‌ هۆكاری دروستكردنی په‌یوه‌ندییه‌كی ستراتیژی له‌نێوان هه‌ردوولادا. به‌ڕێزیان سوپاسی حكوومه‌تی توركیاشی كرد كه‌ له‌ ڕۆژه‌ سه‌خته‌كاندا هاوكاریی هه‌رێمی كوردستانیان كردووه‌.

به‌ڕێز نێچیرڤان بارزانی له‌ وتاره‌كه‌یدا سوپاسی به‌ڕێز وه‌زیری ده‌ره‌وه‌ی توركیای كرد كه‌ پێی خۆش بوو به‌شداری له‌ ڕێوڕه‌سمه‌كه‌دا بكات كه‌ به‌دواداچوونی به‌رده‌وامی بۆ ئه‌نجامدانی ئه‌و پرۆژه‌یه‌ كردووه‌، به‌ڵام به‌هۆی سه‌فه‌ركردن له‌گه‌ڵ به‌ڕێز سه‌ركۆماری توركیا بۆ نیوویۆرك نه‌یتوانی ئاماده‌ بێت. هه‌روه‌ها سوپاسی به‌ڕێزان كامه‌ران ساڵح وه‌زیری پێشوو و ده‌باز كۆسره‌ت وه‌زیری ئێستای ئاوه‌دانكرنه‌وه‌ و نیشته‌جێكرن و د. عه‌لی سندی وه‌زیری پلاندانان و ڕێباز حه‌ملان وه‌زیری دارایبی حكوومه‌تی هه‌رێمی كوردستانی كرد بۆ به‌داوداچوون و هاوكارییان له‌ كۆتاییهێنان به‌م پرۆژه‌ ستراتیژییه‌.
 
بەڕێز نێچیرڤان بارزانی ئاماژەی بە پڕۆژەکە کرد کە لە کاتێکی دژوار و ڕەوشێکی ئاڵۆزی هەرێمی کوردستاندا دەست بە جێبەجێکردنی کرا، لەوانە، شەڕی تیرۆر، هاتنی بەلێشاوی ئاوارە و پەنابەر، دابەزینی نرخی نەوت لە بازاڕەکانی جیهان و فشارە سیاسییەکانی سەر هەرێمی کوردستان و عێراق. هەربۆیە، تەواوبوونی ئەو پڕۆژەیەی بە نیشانەی ئاساییبوونەوەی ڕەوشی ئابووریی کوردستان و سەلماندنی ئەو ڕاستییە لەقەڵەم دا کە هەرێمی کوردستان بەرەو دواڕۆژی باشتر و ڕووناکتر هەنگاو دەنێت. هەروەها ئەوەی بۆ ئیرادەی بەهێزی حکوومەت گەڕاندەوە لە بەرەوپێشچوون و گەیاندنی خزمەتگوزاریی زیاتر بە خەڵکی کوردستان کە هەمیشە پاڵپشتیی حکوومەتی هەرێم بوون.

بەڕێز سەرۆک وەزیران، ئەنجامدانی پڕۆژەی خزمەتگوزاریی بە ئەرکی سەرەکیی حکوومەتی هەرێم دانا و لە دژی ئەوە وەستایەوە کە پڕۆژەکانی حکوومەت بكرێنه‌ موڵکی شەخسی و وەک منەتێک بە خەڵکی بدەنەوە. بەڕێزیان باسی لە گرنگیی پڕۆژەی تونێلی گەلی زاخۆ کرد کە سەرەڕای کاریگەریی ئەرێنی لەسەر کەمبوونەوەی ڕووداوەکانی هاتووچۆ لە سنووری زاخۆ و پاراستنی سەلامەتیی هاووڵاتییانی ناوچەکە، پڕۆژەیەکی ستراتیژیی خزمەتگوزارییە کە سوودی دەبێت بۆ هەموو ناوچەکانی هەرێمی کوردستان و عێراق و پەیوەندی بە زۆر سێکتەری ژیانەوە هەیە و پیرۆزبایی لە خەڵکی ناوچەکە و سەرجەم خەڵکی کوردستان کرد.

بەڕێز نێچیرڤان بارزانی مێژووی خەباتی نیشتمانپەروەرانەی خەڵکی ناوچەی زاخۆ و قوربانیدان و قارەمانییه‌تیی دانیشتووانەکەی لە شەڕی پاراستنی کوردستاندا و بەردەوامبوون لە ئەرکە نیشتمانییەکانیانی بەرز نرخاند، بەتایبەت بەوەی کە سەرجەم چین و توێژەکانی ناوچەکە لە بەرەیەکی مللیدا بوونە پارێزەری کوردستان و مامۆستایان و فەرمانبەرانیان لە ئەرکی ڕۆژانەیان بەردەوام بوون و نەیانهێشت خەونی ناحەزان بەدی بێت.

هەروەها وەسفی میوانداریی زاخۆییەکان لە ئاوارە و پەنابەران بەگشتی و کوردانی ئێزدی و مه‌سیحییه‌كان بەتایبەتی کرد کە بۆ هەمیشە لە بیر و زەینی خەڵکی کوردستاندا دەمێنێتەوە. هەربۆیە بێگومان بوو لەوەی کە ئەو خەڵکە شایانی خزمەتکردنی زیاترن لەلایەن حکوومەتی هەرێمی کوردستانەوە. ئەوەشی گوت کە لەم ساڵانەی دواییدا ئەگەر قەیرانی ئابووری نەبووایە، ئێستا کارەکانی چەندین پڕۆژەی ستراتیژی و خزمەتگوزاریی هاوشێوە لە سەرتاسەری هەرێمی کوردستان به‌ کۆتا گەیشتبوون. 

بەڕێز نێچیرڤان بارزانی لە وتارەکەیدا باسی لە ڕۆژی ٣٠ ئەیلوول کرد کە تیایدا خەڵکی کوردستان بە چوونیان بۆ سەر سندووقەکانی دەنگدان، ئەو نوێنەرانه‌ هەڵبژێرن کە خزمەتی کوردستان دەکەن، بەوەش بەرەو قۆناغێکی نوێ هەنگاو دەنێن. لەو بارەیەوە خەڵکی کوردستانی دڵنیا کردەوە کە ڕۆژانی ناخۆش تێده‌په‌ڕن و حکوومەتی هەرێمی کوردستان بە گەرموگوڕی و بەرچاوڕوونیی زیاترەوە لە گەیاندنی خزمەتگوزاریی بە هاووڵاتییان بەرەوام دەبێت.

بەڕێز سەرۆک وەزیران هیوای خواست چەندین پڕۆژەی هاوشێوە لە ناوچە جیاجیاکانی هەرێمی کوردستان بکەونە واری جێبەجێکردنەوە و پڕۆژەی تونیلی گەلیی زاخۆش ببێتە دەرگایەکی گەورە بۆ بەرەوپێشبردنی بازرگانی و ئابووری و ببێتە مایەی خێر بۆ کوردستان و پتەوترکردنی دۆستایەتیی لەگەڵ وڵاتی دراوسێی تورکیا و لەو ڕووەوە دەستخۆشی لە ئەنجامدەرانی ئەو پڕۆژەیە کرد و سڵاوی نارد بۆ سەرجەم چین و توێژەکانی زاخۆ و شارەکەی بە مەڵبەندی خەبات و شۆڕش و بەرگری و هەروەها شاری پێکەوەژیان و ئارامی و هونەر و هونەرمەندانی ناسراوی کوردستان وەسف کرد.

له‌ كۆتاییشدا دووباره‌ سوپاسی كۆمپانیای جێبه‌جێكار و به‌رێز جه‌مال كایا وه‌ك هاوبه‌شی كۆمپانیای لیماك له‌ جێبه‌جێكردنی پڕۆژه‌كه‌دا و هیوای خواست په‌یوه‌ندییه‌كانی نێوان هه‌رێمی كوردستان و توركیا ڕۆژی دوای ڕۆژ به‌ره‌وپێشه‌وه‌ بچن.

دەقی وتاری بەڕێز نێچیرڤان بارزانی سەرۆک وەزیرانی هەرێمی کوردستانە لە مەراسیمی کردنەوەی تونێلی دووسایدی گەلیی زاخۆ:

ئاماده‌بوویێت هێژا،
مێهڤانێت ڕێزدار،
ڕۆژا هه‌وه‌ ب خێر و هوین هه‌مى ب خێر هاتن، سه‌رچاڤا..

گه‌له‌ك خۆشحاڵم كو ئه‌ڤڕۆ جاره‌كا دى ئه‌مێ ل ده‌ڤه‌را سه‌ر‌بلندا زاخۆ داكو هوین و ئه‌م هه‌مى پێكڤه‌ ببینه‌ شاهدێت هاڤێتنا پێنگاڤه‌كا دى یا گرنگا خزمه‌تگوزاریێ بۆ ڤێ ده‌ڤه‌رێ بتایبه‌تى و بۆ هه‌مى هه‌رێما كوردستانێ و هه‌تا بۆ هه‌مى عێراقێ ژى بگشتى.

ڤه‌كرنا ڤێ تونێلا دوسایدى ل سه‌ر ڤێ ڕێكا گرنگا نێڤده‌وله‌تى، یا كو هه‌رێما كوردستانێ و عێراقێ دگه‌ل توركیا پێكڤه‌ گرێ دده‌ت، پڕۆژه‌یه‌كا ستراتیژى یا مه‌زن یا خزمه‌تگوزارییه. ئه‌ڤ پڕۆژه‌ گرنگیا وێ ئه‌وه‌ كو نه‌ پڕۆژه‌یه‌كێ ئاسایییه‌، ب چێكرنا ڤێ تونێلێ كاروبارێن هاووڵاتی، بازرگانی یا ناڤبه‌را توركیا دگه‌ل هه‌رێما كوردستانێ و عێراقێ دێ پێشكه‌فتنه‌كا مه‌زن بخۆڤه‌ بینیت.

لێره‌ حكوومه‌تا هه‌رێما كوردستانێ نێزكى (143) ملیۆن دۆلارا یێ بۆ ڤێ پڕۆژێ ته‌رخانكری كو درێژاهیا وێ (سێ هه‌زار و شه‌شسه‌ت مه‌ترن). ئه‌ڤ تونێله‌ كو پڕۆژه‌یه‌كا وه‌زاره‌تا ئاڤه‌دانكردن و نیشته‌جێكرنێ یا حكوومه‌تا هه‌رێما كوردستانێیه‌، ب سه‌رپه‌رشتیا (ڕێڤه‌به‌ریا ڕێكوپرا ل پارێزگه‌ها دهۆكێ) ژ لایێ كۆمپانیا (لیماك) یا توركیڤه‌ هاتیه‌ ئه‌نجامدان و كۆمپانیا (مان گرووپ) ڕێكێت وێ چێكرینه.

هه‌ر ب ڤێ هه‌لكه‌فتنێ ئه‌ز ب ناڤێ هه‌ویێن هێژا و هه‌می ئاماده‌بوویا، بخێرهاتنه‌كا گه‌رما برایێ خۆشتڤی ڕێزدار (نیهات ئۆزده‌میر) سه‌رۆكێ لیماكێ و مێڤانێت دگه‌لدا دكه‌م. ب خێر بێن بۆ هه‌رێما كوردستانێ. بخێرهاتنا كونسولێ گشتی یێ توركیا ل هه‌ولێری دكه‌م كو ژ هه‌ولێرێڤه‌ ته‌شریفا ئینای و ب خێر بهێت سه‌رچاڤا بۆ ڤێ ڕێوڕه‌سمێ.

من دڤێت لێره‌ به‌حسا هندێ بكه‌م كو سه‌رباری هه‌موو ئاریشه‌یێت هاتیه‌ پێش، سوپاسییه‌كا تایبه‌تی یا كۆمپانیا لیماك بكه‌م كو سه‌ره‌ڕای بارێ ئابووری و ئاریشه‌یێت هه‌رێما كوردستانێ، تنێ بۆ ده‌مه‌كێ كێم وانا پڕۆژه‌ ڕاگرت و پشترا ئه‌ڤ پڕۆژه‌ یا به‌رده‌وام بوو. باوه‌ریا وان ب هه‌رێما كوردستانێ و باوه‌ریا مه‌ ژی ب كۆمپانیا لیماك دبیته‌ هۆكار جاره‌كای ببێژین كو ئه‌م هیڤیدارین ئه‌ڤ كارێ مه‌ ئه‌ڤڕۆ كری بۆ ڤه‌كرنا ڤێ تونێلێ، ده‌ستپێكرنا په‌یوه‌ندییه‌كان ستراتیژی و درێژخایه‌ن بیت دگه‌ل ڤێ كۆمپانیایێ. ڕێكێ بده‌نه‌ من ب ناڤێ هه‌وه‌ و هه‌رێما كوردستانێ جاره‌كا دی سپاسیا ده‌وڵه‌تا توركیا بكه‌م كو هه‌رده‌م د كاودانێت زه‌حمه‌تیێدا هاریكار و پشته‌ڤان بووینه‌ بۆ حكوومه‌تا هه‌رێما كوردستانێ و گه‌لێ كوردستانێ ب شێوه‌یه‌كێ گشتی.

ئه‌م خۆشحال دبین كو دبینین ئه‌ڤڕۆ جه‌نابێ وه‌زیرێ ده‌رڤه‌ كو به‌ری نۆكه‌ ب ته‌له‌فۆنێ دگه‌ل من ئاخفت و حه‌ز دكر د ڤێ ڕێوڕه‌سمێدا به‌شدار بیت، به‌لێ ژبه‌ر سه‌فرا وی دگه‌ل جه‌نابێ سه‌رۆك كۆمارى بۆ نیوویۆركێ نه‌شیا به‌شدار بیت. مه‌ دڤێت ب ڕاستی سپاسییه‌كا جه‌نابێ وی ژی بكه‌م كو خه‌مخۆریا وی، دیڤچۆنا به‌رده‌واما جه‌نابێ وی لسه‌ر ڤی پڕۆژه‌ی ببه‌ سه‌ده‌م كو ئه‌ڤڕۆ ئه‌م ڤێ پڕۆژێ لێره‌ ببینین دهێته‌ ڤه‌كرن.

من دڤێت لێره‌ سپاسییه‌كا تایبه‌ت یا وه‌زیرێ ئاڤه‌دانكرن و نیشته‌جێكرنێ یا حكوومه‌تا هه‌رێما كوردستانێ یێ پێشتر به‌ڕێز كامه‌ران ساڵح بكه‌م كو د وه‌ختێ خۆدا و ده‌ما مه‌ ئه‌ڤ پڕۆژه‌ ل سالا 2013 دانای، جه‌نابێ وی وه‌زیر بوو كو ئه‌ڤڕۆ نزانم داوه‌ت نه‌كریه‌ یان نه‌هاتیه‌، به‌لێ من دڤێت ل ڤێره‌ بێژمێ كو سپاسیا ڕۆڵ و خه‌مخۆریا وی دكه‌م كو دخواست ئه‌ڤ پڕۆژه‌یه‌ بهێته‌ جیبجیكرن.

سپاسیا وه‌زیری نها یا ئاڤه‌دانكرن و نیشته‌جێكرنێ، به‌ڕێز ده‌رباز كۆسره‌ت ڕه‌سوول دكه‌م كو وی ژی خه‌مخۆرییه‌كا زێده‌ ژبۆ ڤێ پڕۆژێ نیشان دا. سپاسیا به‌ڕێز د. عه‌لی سندی دكه‌م كو وی ژی به‌رده‌وام دیڤچۆن دكر داكو ئه‌ڤ پڕۆژه‌ بگه‌هیته‌ ئه‌نجام. یا ژ هه‌میا گرنگتر سپاسیا به‌ڕێز ڕێباز حه‌ملان دكه‌م وه‌كی وه‌زیرێ دارایی كێماسى نه‌كریه‌ و هه‌وڵێت جددی دانه‌ بۆ ته‌رخانكرنا بودجێ پێویست ژبۆ ڤێ پرۆژێ.

ئه‌گه‌ر ئه‌م به‌رێ خۆ بده‌ینه‌ ده‌ما ده‌سپێكرن و ئه‌نجامدانا ڤێ پڕۆژێ و پڕۆژێت دى یێت وه‌كى ڤێ، دێ بینین كا د سه‌رده‌مه‌كێ چه‌ندێ دژواردا هاتیه‌ چێكرن! ده‌مه‌كى بوو كو هه‌رێما كوردستانێ د ڕه‌وشه‌كا ئاڵۆز و گراندا ده‌رباس دبوو. بێ بودجه‌یى، شه‌ڕێ تیرۆرێ و هاتنا ب سه‌دان هزار ئاواره‌ و په‌نابه‌را بۆ هه‌رێما كوردستانێ و بۆ به‌هدینا بتایبه‌تى، كه‌فتنا به‌هایێ نه‌فتێ و ئالۆزى و فشارێت سیاسى یێت به‌رده‌وام ل هه‌رێما كوردستانێ و عێراقێ، ڤا هه‌میا كوردستان ئێخستبوو د ڕه‌وشه‌كا گه‌له‌كا ب زه‌حمه‌ت و گراندا.

ته‌مامكرنا پڕۆژێ و ڤه‌كرنا وێ ب شیوه‌كێ فه‌رمى، نیشانه‌كێ مه‌زن یێ ڕابوونه‌ڤا ڕه‌وشا ئابوورى یا هه‌رێما كوردستانێیه‌. وێ ڕاستیێ دسه‌لمینیت كو ئه‌م یێ ل سه‌ر ڕێكا ڕاست به‌ره‌ڤ پاشه‌ڕۆژه‌كا باشتر و ڕۆنتر بۆ گه‌لێ خۆ، گاڤا دهاڤێژین. نیشانێ موكومیا ئیرادا حكوومه‌تا هه‌رێما كوردستانێیه‌ بۆ به‌ره‌ڤ پێشچوونێ و خزمه‌تا خه‌لكێ كوردستانێ. ئه‌و ئیرادا كو حكوومه‌تێ ژ پشتگیرى و پشته‌ڤانیا خه‌لكێ كوردستانێ یێ خۆڕاگر وه‌رگرتى و هێلاى كو لسه‌ر پێ یێت خۆ بمینیت و نه‌كه‌ڤیت.

ڕاسته‌، ئه‌ڤ تونێله‌ وه‌ك جوگرافیا ل زاخۆیه‌، یه‌كسه‌ر كاریگه‌ریێ ل سه‌ر بزاڤا هاتوچۆیێ ل زاخۆ و ده‌ڤه‌رێ بتایبه‌تى دكه‌ت و دێ بیته‌ ئه‌گه‌رێ كێمكرنا ڕویدانێت هاتوچۆیێ و پاراستنا زێده‌ترا سه‌لامه‌تیێ بۆ خه‌لكێ ده‌ڤه‌رێ، كو ڕۆژانه‌ و زێده‌تر ڤێ ڕێكێ بكار تینن.

ژبه‌ر هندێ، ده‌سپێكێ ئه‌م ڤه‌كرنا ڤێ پڕۆژێ ل خه‌ڵكێ زاخۆ و ده‌ڤه‌را به‌هدینا بتایبه‌تى، پاشێ ل خه‌لكێ كوردستانێ و ل عێراقێ ژى بگشتى پیرۆز دكه‌ین. پیرۆزباهیێ ل خه‌ڵكێ دهۆك، ئامێدى و ئاكرێ، ل خه‌لكێ هه‌ولێرێ و سلێمانیێ، هه‌له‌بجه‌ و گه‌رمیان، ڕاپه‌ڕین و هه‌مى هه‌رێما كوردستانێ دكه‌ین، كو ئه‌م پشتڕاستن هه‌مى پێكڤه‌ دێ مفای ل ڤی پڕۆژه‌ی بینن.

ئه‌نجامدانا كار و پڕۆژا و خزمه‌تكرنا خه‌لكێ كوردستانێ، ئه‌ركێ ئێكه‌م و سه‌ره‌كى یێ حكوومه‌تا هه‌رێما كوردستانێیه‌. ئه‌ركێ حكوومه‌تێیه‌ و چ منه‌ت تێدا نینه‌. چێنابیت ئه‌م كار و پڕۆژێت حكوومه‌تێ بكه‌ینه‌ ملكێ شه‌خسى و وه‌كى منه‌ته‌كى بده‌ینه‌ خه‌لكى!  كوردستانى بگشتى و خه‌لكێ ڤێ ده‌ڤه‌رێ بتایبه‌تى، خه‌لكێ زاخۆكا ده‌لال، هێژایى هه‌مى خزمه‌ته‌كێنه‌. خه‌لكێ زاخۆ خودانێ دیرۆكه‌كا درێژا خه‌باتگێرى و وه‌لاتپارێزیێنه‌. د دیرۆكێدا، ئه‌و قه‌هره‌مانێت گه‌له‌ك شۆڕش و سه‌ر‌هلدانێت كوردستانێنه‌. د شه‌ڕێ پاراستنا كوردستانێدا كێم جهێت ڤى وه‌لاتى هه‌نه‌ كو ب خوینا شه‌هیدێت زاخۆ و زاخۆییا، سۆر نه‌بووبن. ئه‌م ئه‌ڤڕۆ هه‌می وان عه‌زیزا دئینینه‌ بیرا خۆ، به‌ژنا خۆ بۆ وان دچه‌مینین.

د شه‌ڕێ تیرۆریدا،  قوربانى یێت مه‌زن بۆ كوردستانێ دان. خه‌لكێ زاخۆ و به‌هدینا بگشتى ب درێژیا قه‌یران و زه‌حمه‌تى یێت كوردستانێ، ڕۆژه‌كێ بتنێ ژى خۆ ژ هیچ ئه‌ركه‌كێ خۆ یێ نیشتمانى و كوردستانى پاشڤه‌ نه‌دا. چ جار ناهێته‌ ژبیرن كو دگه‌ل هه‌مى زه‌حمه‌تى و ئالۆزیا، خه‌لكێ ڤێ ده‌ڤه‌رێ،  ئه‌ركێ خۆ یێ پاراستنا ڤى وه‌لاتى ب ڕوح و گیان ب جى ئینا. هه‌مى جوین و ته‌خێت خه‌لكى، سڤیل و فه‌رمانبه‌ر، پێكڤه‌ د به‌ره‌یه‌كێ مللیدا، بوونه‌ پارێزه‌رێت كوردستانێ. دگه‌ل هه‌مى كێشه‌ و قه‌یرانا ژى، فه‌رمانبه‌رێت ڤێ ده‌ڤه‌رێ بۆ ڕۆژه‌كێ ژى چیه‌، ئه‌ركێ خۆ نه‌هێلا و لسه‌ر خۆ قه‌بوول نه‌كر كو ببنه‌ جهێ دلخۆشیا نه‌یار و نه‌حه‌زێت هه‌رێما كوردستانێ و نه‌هێلا حكوومه‌تا هه‌رێما كوردستانێ بشكێت و به‌رده‌وام بوون لسه‌ر كارێت خۆ یێت خزمه‌تگوزاری. ئه‌ڤه‌ قه‌ت ناهێته‌ ژبیركرن.

چ جارا ناهێته‌ ژبیركرن ده‌ما كو مامۆستایێت سه‌ربلندێت ڤێ ده‌ڤه‌رێ په‌یاما خوه‌ گه‌هاندی و گۆتى: ئه‌م ناهێلین زاڕۆكێت پێشمه‌رگا بێ خویندن بمینن و ڕۆژه‌كێ  بتنێ ژى نه‌هێلان ده‌رگه‌هێت قوتابخانا‌  ل  ڤێ  ده‌ڤه‌رێ بێنه‌ گرتن، ئه‌ڤه‌ جهێ ڕێز و پێزانینێیه‌ و قه‌ت نابیت بهێته‌ ژبیركرن.

مێڤاندارى و مێڤانپه‌روه‌ریا خه‌ڵكێ زاخۆ و به‌هدینا بگشتى بۆ ئاواره‌ و په‌نابه‌را،  بۆ خوشك و برایێت مه‌ یێت ئێزدى،  بۆ كرستیانیا، به‌رده‌وام دێ وه‌كى بیرهاتنه‌كا‌ زندى د هزرا هه‌می خه‌لكێ كوردستانێدا مینیت. ئه‌ڤ خه‌لكێ هۆسا،  بێگومان هێژایى هه‌مى كار و خزمه‌ته‌كێیه‌ و ئه‌ركێ حكوومه‌تێیه‌ خزمه‌تا وان بكه‌ت. ئه‌گه‌ر ئیمكان و ده‌رفه‌ت هه‌بانه‌ و پێنج سالێت چۆیى، ئه‌و ڕه‌وشا ئالۆز و گران نه‌با،  باوه‌ر بكه‌ن ئه‌ڤڕۆ ل ڤێرێ و ل سه‌رانسه‌رى هه‌رێما كوردستانێ ژى، دا گه‌له‌ك پڕۆژێت دى یێت ستراتیژى و خزمه‌تگوزارى یێت هۆسا هه‌بن و دا ب ئه‌نجام گه‌هینین.

ئاماده‌بوویێت هێژا،
د ده‌مه‌كیدا كو ئه‌م یێ به‌ره‌ڤ قۆناغه‌كا نوى گاڤا دهاڤێژین و دویماهییا ڤێ هه‌یڤێ،  ڕۆژا سیهى ئیلۆنێ خه‌لكێ كوردستانێ دێ چیته‌ سه‌ر سندۆقێت ده‌نگدانێ،  جاره‌كا دى من دڤێت هه‌وه‌ و هه‌مى خه‌لكێ كوردستانێ پشتڕاست  بكه‌م كو ڕۆژێت زه‌حمه‌ت و گران هێدى هێدى ده‌رباز بوون ب خۆڕاگری و تێگه‌هشتنا هه‌وه‌. ب خۆڕاگریا خه‌لكێ كوردستانێ و تێگه‌هشتنا وان  بۆ ته‌حه‌دى و فشارێت هاتیه‌ سه‌ر ڤى وه‌لاتى،  سه‌ر ڤى ملله‌تى، چاوا مه‌ ئه‌و ڕۆژ ده‌رباز كرن،  وه‌سا ژى ڕۆژێت ڕۆنتر یێ بڕێڤه‌ و حكوومه‌تا هه‌رێما كوردستانێ دێ گه‌ر‌موگوڕتر كه‌ڤیته‌ خزمه‌تێ.

داخازێ دكه‌م هوین هه‌مى پێكڤه‌، ڕۆژا هه‌لبژارتنێ د پرۆسه‌كا جوان و هێمن و شارستانیدا هه‌ڕنه‌ سه‌ر سندۆقێت ده‌نگدانێ و نوێنه‌رێت خۆ یێت كو  هوین دزانن دێ خزمه‌تا هه‌وه‌ كه‌ن، دێ خزمه‌تا كوردستانێ كه‌ن، بۆ خوه‌ و كوردستانێ هه‌لبژێژن. ده‌نگدان مافه‌كه‌ كو تڤیا باش بێته‌ بكارئینان و ئه‌نجامێ ده‌نگدانا هه‌وه‌، كار و خزمه‌ت و پێشكه‌شكرنا خزمه‌تگوزاریا و ئاڤاكرن و پێشڤه‌برنا هه‌رێما كورستانێ نه‌.

ل دویماهێ، جاره‌كا دى دێ پیرۆزباهیێ ل خه‌لكێ زاخۆ و به‌هدینان و هه‌می كوردستان و عێراقێ كه‌م بۆ ڤى پڕۆژێ ستراتیژی یێ مه‌ ئه‌ڤرۆ ل ڤێره‌ ڤه‌كری.

جهێ ڤێ تونێلێ، گه‌لیێ زاخۆ،  دوهى ب داستان و قه‌هره‌مانیێت پێشمه‌رگا، بوویه‌ لاپه‌ڕه‌كێ گه‌شێ دیرۆكا مه. هیڤیدارین ئه‌ڤڕۆ ژى ب ڤێ پرۆژێ ببیته‌ ده‌رگه‌هه‌كێ مه‌زنێ خێرێ، بۆ پێشڤه‌برنا بازرگانى و ئابوورى، بۆ خێر و خزمه‌تا كوردستانێ و عێراقێ دگه‌ل وه‌لاتێ جیرانێ مه‌ توركیا كو هه‌می گاڤا د ته‌نگاڤیادا هاریكارێ مه‌ بوویه‌.

سپاس و ده‌ستخۆشى بۆ هه‌مى ئالیێت ب هه‌ر شێوه‌یه‌كى به‌شدارى و هاریكاریا وان دڤێ پرۆژێدا هه‌ى. هیڤیا سه‌ركه‌فتنێ بۆ هه‌وه‌ هه‌میا دخوازم. نه‌خشه‌ بیت ل گه‌له‌ك كار و پڕۆژێت دى ل ڤێ ده‌ڤه‌رێ.

سلاڤ ل خه‌لكێ زاخۆیا ده‌لال، ل گه‌نج و لاوا، ل دایك و خوشك و ل پیر و كالێت زاخۆ.  زاخۆیا خه‌باتێ و شۆڕش و به‌ڕه‌ڤانیێ، زاخۆكا كانییا زه‌لال یا هونه‌ر و سترانا كوردى و لاندكا ب ده‌هان هونه‌رمه‌ندێت دیار و به‌رناسێت كوردستانێ، زاخۆكا پێكڤه‌ژیان و ته‌ناهیێ، به‌هدینا یا پێكڤه‌ژیان و ته‌ناهیێ.

جاره‌ك دى هوین هه‌می لایه‌ك ب خێر بێت سه‌رچاڤا،
ئه‌ز جاره‌كا دی دیسا سپاسیا به‌ڕێز جه‌مال كایا دكه‌م كو ئه‌ڤڕۆ وه‌كی هاوبه‌ش دگه‌ل كۆمپانیا لیماك ل ڤێره‌ به‌شدار بوویه‌. ب ڕاستی ئه‌ز چ جارا ڕۆڵا وی ژبیر ناكه‌م. دیسا سپاسیا به‌ڕێز نیهاد ئۆزده‌میر دكه‌م و هیڤیدارم پڕۆژێت زێده‌تر بێنه‌ ئه‌نجامدان. هیڤیا مه‌ ئه‌وه‌ كو سلاڤێت هه‌رێما كوردستانێ و خه‌لكێ هه‌رێما كوردستانێ بگه‌هینیته‌ جه‌نابێ سه‌رۆك كۆمارێ توركیا و هیڤیدارین ئه‌ڤ په‌یوه‌ندییا ناڤبه‌را مه‌ ڕۆژ بۆ ڕۆژێ به‌ره‌ڤ باشتر و بهێزبوونێ بچت د به‌رژوه‌ندییا هه‌می لایه‌كێدا.

هون هه‌می لایه‌ك زۆر ب خێر بێن سه‌رچاڤا،
زۆر سپاس.


 



بابه‌ته په‌یوه‌ندیداره‌کان